「即食麵落乜餸」引爆熱討 第一名唔係午餐肉廚師腸 網民狂推呢樣靈魂配料！

煮即食麵究竟加乜嘢餸先係正宗？有網民於討論區以「煮即食麵有乜嘢餸係必落？」發帖，隨即引發全網熱烈討論！樓主率先分享個人最愛搭配「蛋、韭菜餃、獅子狗」，不料大批網民完全不買帳，紛紛耍手擰頭，帖文更慘獲逾百個劣評。

樓主偏好的「韭菜餃」與「獅子狗」遭到嫌棄，但「蛋」則成為絕大多數網民的共識，紛紛留言狂推：「辛辣麵要落生蛋」、「太陽強（蛋）必落」、「燶邊煎蛋」，大讚「加隻蛋，咩麵都好食」。不過，亦有追求極致方便的網民反對：「我煮得公仔麵就係懶，仲要煎蛋，洗鑊我係無法想像。」

至於獲得高正評的配料，則由經典港式麵檔熱門配料包辦，包括午餐肉、五香肉丁及廚師腸。有網民更升級提出「即食麵五寶」的邪惡食法，即集齊午餐肉、沙嗲牛、五香肉丁、廚師腸及太陽蛋。各種邪惡配料大合集，亦惹來注重健康的網民留言打趣及提醒：「呢個post好明顯個個都係雙下巴大肚腩。」、「bmi超過30？」