九龍灣電車駁商場13A插蘇 遭質疑「偷電」 網民嘲：1個鐘頭叉得嗰2度電

網上流傳多張照片，指一輛 Tesla 私家車，懷疑私自使用九龍灣某商場的公眾 13A 插蘇充電，事件曝光後迅速在各大社交平台引起熱議。

從網上圖片可見，事發地位於九龍灣某商場的停車場7樓。涉事車輛為一輛貼上啞灰色車身膜、加裝了尾翼及大包圍的 Tesla 私家車，泊於車位內的車主將隨車充電線直接接駁至旁邊藍色牆身柱上的 13A 公眾插蘇座。上載照片的網民留言直斥：「咁明目張膽用商場啲電叉電 (已同商場職員講，佢地影左相話跟進)」。

貼文引起熱議，大批留言紛紛指責車主行為極度自私，甚至質疑已涉嫌違法：「可以報警。偷電算係盜竊。」除了批評聲浪外，網民亦紛紛對車主的行為嘲諷差：「有錢貼膜、加尾翼、裝大包圍，居然肉酸到要偷電差，連13A都唔放過，正宗鱷魚頭老襯底～」、「有錢裝包圍冇錢叉電」。同時，更有熟悉電動車規格的網民留言精算，指出用 13A 插蘇充電效率極低：「13 A慢叉，一個鐘頭叉得嗰兩度電，呢個車超過70度，起碼差35個鐘」。