璀璨之城｜高海寧一集換足8套衫！與張曦雯互窒超精彩 親解「女強人」造型心思細節

台慶劇《璀璨之城》昨晚（13日）劇情再掀高潮！兩大女神高海寧（高Ling）與張曦雯（Kelly）上演一場火藥味極濃的對手戲，絕對讓觀眾睇到唞不過氣。

今集劇情講述高級檢控官洪海允 Alice（高海寧飾）強勢介入調查「尚利鋒集團」涉嫌的商業罪案，並傳召官家三父子問話，牽出圍標與機密外洩疑雲。Alice與身為官家二少奶的王雪瑩 Kate（張曦雯飾）在警署狹路相逢，多年不見的兩人一碰面即刻「唇槍舌劍」。

護夫心切的 Kate 率先發難挑釁：「唔會係你爭住嚟做，專登要告我先生呀？」Alice 冷靜回應表示並非由她一人話事，Kate 即借機單打：「以為你做到好高級添，乜你話唔到事㗎？」面對對方步步進逼，Alice 一副冷靜以「證據說話」回敬。其後 Kate 更試圖以豪門幸福人妻的身份示威，結果遭 Alice 霸氣連環反擊：「我工作先，邊得閒拍拖，點同你呀細細個就立志做幸福少奶奶」、「原來你呢十幾年來仲係圍住官孝君轉呀？」兩人互寸互窒，火花四濺，場面極度精彩！

除了火爆的對手戲，不少網民更留意到高Ling今集一登場已猶如「行 Catwalk」，一集內換足8套衫！配合一頭俐落的 One-length 短髮，將專業能幹的形象發揮得淋漓盡致。

高Ling接受 tvb.com 獨家訪問時透露，在造型上與監製陳維冠（Joe）溝通了很久：「呢個頭髮係有一日我覺得想係咁，所以就去剪。因為角色係高級檢控官，要呈現到好 tough、俐落同專業嘅感覺，所以啲衫剪裁都會起角、非常挺身同修身，初頭亦會以褲裝為主。」

為求完美，高Ling對妝容及配飾細節亦一絲不苟：「我提議個妝要好簡單乾淨，仲特別要求加『下眼線』，令幹練嘅感覺更加突出！」她又指 Alice 的服裝與手袋主要以黑白色為主調：「首飾唔會揀好女性化嗰種，我會戴啲復古耳環。最重要係『重質不重量』，咁先可以突顯角色嘅高級品味。」