璀璨之城｜張曦雯化身心計二少奶 自爆初時演得唔夠放 激讚吳卓羲眼神有戲：一望就入戲

由張智霖、吳卓羲、高海寧、張曦雯、姜大衞、陳瀅、江美儀、陳煒和蔣祖曼等主演的《璀璨之城》將於下周一（12日）隆重播映。 除了張智霖與吳卓羲相隔13年再度合作上演豪門兄弟博弈外，兩大女主角高海寧（高Ling）與張曦雯（Kelly）的「妯娌之爭」同樣是全劇焦點。兩人在劇中由昔日好姊妹走向決裂，雙雙嫁入官家後展開連場明爭暗鬥，火花四濺。

Kelly在劇中演官家二少奶王雪瑩Kate，深愛老公孝君，為了幫助另一半上位，可謂心計十足、甚至不惜一切。

Kelly接受tvb.com獨家訪問時直言這是她首次參演家族豪門鬥爭劇，面對這個充滿計算且行事狠辣的角色，她直認初時演得未夠放：「阿Kate做事做得好出面，好多時候會喺啲唔適合嘅場合講啲難聽嘅說話，初頭都會擔心係咪真要做得咁衰，但Joe（監製）畀咗好多鼓勵我，令我愈做愈放膽，我都覺得呢個角色係好好玩，對我係新嘅嘗試。」

她續指劇組曾因劇本調整而停拍了兩個月，這段時間反而讓其有更充足的準備，「 初時係做得唔夠 ，阿Joe都有同我講要再點調整。嗰兩個月正好畀咗時間我重新整理，好好進入角色嘅情緒，之後再開機拍攝時，感覺真係更加得心應手。」

至於首次與卓羲合作，Kelly對這位拍檔讚不絕口，直指對方極具感染力，「佢嘅眼神真係好有戲，好似對我角色嘅唔理解或者佢做錯嘢我質問佢時嘅慚愧樣，全部都喺佢眼神入面，所以我一望住佢就好入戲 。」 除了演技出色，她亦大讚卓羲是好演員的榜樣，「佢個人好搞笑，日日同佢開工都好開心，同埋佢亦好細心好錫身邊人，對台前幕後嘅人員都好照顧。」