英聯盃：阿仙奴12碼險勝水晶宮闖四強

已複製連結

英格蘭聯賽盃八強，阿仙奴主場與水晶宮踢成1-1後，互射十二碼險勝8-7晉級。

紅白衫的阿仙奴，上半場多次攻勢都具威脅，馬天尼利挑高，馬度基近門一控一篤，過不了水晶宮門將禾特賓尼迪斯。繼續由馬天尼利策動，養傷七個月後首度擔任正選的加比爾捷西斯頭槌被撲，馬度基補射都是不入。禾特賓尼迪斯為水晶宮高飛低撲。水晶宮換邊後都要考驗阿仙奴門將，拿馬遠距離擲界外球，阿列沙巴拿加夠專注。

連續兩屆八強碰頭，阿仙奴去年憑加比爾捷西斯大演「帽子戲法」贏球晉級，今次靚熨遇上靚救。「求己不如求人」，沙卡的角球引起混戰，皮球彈來彈去，最終由拿確斯踢入自己龍門，阿仙奴收「烏龍球」大禮，81分鐘領先。有機會在補時攻入「保險球」，祖利安添巴「打荷包」再射，又過不了禾特賓尼迪斯。

結果水晶宮補時五分鐘，戲劇性由隊長古希接應拿馬的二傳，追成1-1、亦是法定時間的比數，直入互射十二碼階段。

兩隊射到第八輪才分出勝負。阿仙奴中堅沙利巴射左下角入。擺烏龍送禮的拿確斯為水晶宮操刀，被阿列沙巴拿加捉到路。阿仙奴十二碼贏8-7，驚險晉級，將與車路士爭入決賽。