英聯賽盃八強：曼城 2-0 賓福特

已複製連結

英格蘭聯賽盃八強，衛冕的紐卡素驚險晉級。曼城主場以2-0淘汰賓福特。

淺藍衫的英超「二哥」曼城，迎戰英超排名15的賓福特，先有奧斯卡波普，在右路個人突破入禁區，試試腳風，但19分鐘傷出，由科頓入替。

賓福特隨即有馬菲亞斯贊臣，離門20多碼的罰球，考驗查福特的身手。賓福特對上五次對賽未贏過，
另一邊廂的曼城，都有卓基禁區外起腳，射得太正被擋出。

八屆冠軍「藍月亮」，累計對上五場全勝。十月與賓福特在聯賽交手，亦小勝一球。卓基再次在禁區外施射，終於得手，表演一段機械舞慶祝，32分鐘開紀錄，繼上一圈贏史雲斯3-1後，再有進帳。

夏蘭特做後備，曼城火力一樣有保證。沙雲奴接應雷恩達斯「過頭波」後，帶到左路窄位省中人彈高，效果更好。原來省中艾查，沙雲奴67分鐘奠定2-0勝局，相隔四屆再入四強。將鬥紐卡素。

黑白衫、衛冕的紐卡素，主場險勝富咸，韋沙先在10分鐘開紀錄，順勢跟進歷高馬迪的撲救射入。

不過富咸6分鐘後，靠盧傑無人看管頂入，追成1-1完半場。

紐卡素換邊後，一度靠「烏龍波」再破門，但造烏龍的積及梅菲越位在先。

今季英超首循環交手，紐卡素主場贏2-1。同樣比數補時2分鐘出現，邁利接應東拿利的角球，頂入「絕殺」。紐卡素驚險晉級。