游嘉欣放棄「生啪」改用熱水焗媽咪麵 網民崩潰：見到我會報警

陪伴無數港人成長的國民零食「媽咪麵」，標準食法向來是隔袋捏碎麵餅、倒入調味粉搖勻後直接「生啪」乾吃。不過，小花游嘉欣（游游）近日就在社交網公開自己的獨門食法，徹底顛覆大眾認知！她貼出用熱水沖泡媽咪麵的照片，大方分享食後感：「食媽咪麵係焗熟派🥰 口感脆脆地，又腍腍地」。

帖文一出，立即在網上掀起「生啪派」與「焗熟派」的激烈交鋒。不少死忠「生啪派」網民對這種食法大感震驚，戲稱屬於飲食界的「犯罪」行為，紛紛湧入留言區「抗議」：「見到我會報警」、「我試過滾水落媽咪麵😂 呢個係我人生最後悔既事」、「細個出於好奇煮熟個媽媽麵食。 真係要講聲阿媽我以後都唔敢」。

與此同時，亦有不少隱藏版食家現身支持游嘉欣，分享進階煮法：「以前試過用微波爐，加水叮熱佢嚟食，又真係幾好食」、「睇嚟成班都唔知，煮媽咪麵加咖哩，蒜汁先係唯一解 」。見自己意外引爆全網熱議，游嘉欣隨後再度發文幽默回應，笑問：「笑死我啦，焗熟媽咪麵係咪一個罪名，但真係好好食」，更向網民極力推介：「試過一次，返唔到轉頭」，對「焗熟派」食法相當堅持。