洪永城做廿四孝爸滿足愛女要求！帶細女搭叮叮睇風景 兩父女大玩神同步表情包勁溫馨

圈中出名的「廿四孝爸爸」洪永城（Tony）平時工作幾忙都好，一有時間就會爭取時間陪伴一對前世情人！近日 Tony 抽空陪細女（阿妹）去街放電，問到阿妹最想去邊度時，囡囡竟然話要搭「叮叮」（電車），還極具霸氣爆出一句金句：「I want to see everything🤣」。

聽到阿妹年紀細細就話要「睇晒全世界」，真係完美遺傳了爸爸這位旅遊節目主持的探索精神。面對囡囡可愛的要求，Tony 當然父愛氾濫，盡量滿足愛女心願，帶她搭叮叮欣賞港島風景。相中見到阿妹乖巧坐在電車的木椅上，眼仔睩睩極度精靈可愛。

兩父女在車程中瘋狂自拍大玩表情包，Tony 又在鏡頭前擘大個口搞怪，而阿妹則在旁邊嘟起嘴仔，反差萌十足。另一張相兩父女還對着鏡頭一起神同步伸脷賣萌，表情十足十餅印一樣！