夫妻的博奕｜孔德賢再演富二代求突破 拒做偶像派大爆真實面貌：我唔覺得自己靚仔

《夫妻的博弈》劇中除了男女主角的角力，飾演富二代「胡哲朗」的孔德賢（Danny）同樣是一大亮點。擁有亮眼外表的他，在劇中處處表現出不甘被家姐 Quinn（陳曉華飾）搶盡風頭的野心，豪門姊弟鬥爭一觸即發！

講到衍嶸集團與東馹集團舉行合作框架協議簽署儀式，作為東馹集團行政總裁的哲朗，理應是全場記者追訪的唯一焦點。

豈料「太后」葉卓苓君（黃文慧 飾）竟在現場投下震撼彈，即場公布葉、胡兩家正式結為姻親，宣佈Aiden（馬國明飾）與Quinn將會拉埋天窗！此話一出，瞬間搶去哲朗所有風頭，令本應是主角的他慘成佈景板，心生不忿。

事後哲朗一臉不爽，向父親胡振東（李成昌 飾）大吐苦水：「啱啱影咗咁多張相，偏偏剩係登咗最後嗰張大合照，個C位畀晒 Aiden 同你個女呀，我就得半邊臉！」他更重提舊帳，直指上次廣告風波被奪權：「我等咗咁耐就係等今日，我依家要做乖仔都要有人睇到先得㗎！」

見到兒子呷晒大醋，胡振東即刻派定心丸，承諾只要他安分守己，必定找大把精英幫他上位接班。哲朗聽到老竇這番保證，隨即上演「一秒變臉」，由極度勞氣瞬間轉為暗喜，自覺勝券在握，盡顯豪門公子有機心的一面！

今次繼《新聞女王》後再演富二代，Danny 接受 tvb.com 獨家訪問時直言演繹上有很大分別：「今次要成熟啲，因為呢個角色唔係遊手好閒嘅富二代，佢係有上進心、渴望得到權力，但偏偏佢又『奸得嚟又好蠢』，好希望可以呈現到呢種感覺畀觀眾睇。」

雖然劇中角色高調又機心重，但Danny自言現實性格反差極大：「現實中嘅我其實好樸素簡單，同埋我從來唔覺得自己特別靚仔。我唔係嚟做偶像，我係做演員，希望觀眾可以睇到我嘅可塑性！」

至於今次與李成昌及陳曉華演一家人，Danny 直言合作得相當愉快：「我同昌哥之前都合作過，大家都好 Friend，佢好好人，真係好似我爸爸咁；而 Hera（陳曉華）我哋識咗好多年，大家私底下都係好朋友，所以拍起上嚟默契十足！」