非份之罪｜陳煒大鬥盧宛茵 凌厲眼神奸到出汁

無綫劇集《非份之罪》14日播出的單元《一億殺機》高潮迭起！陳煒與「奶奶」盧宛茵再度上演激烈的婆媳嘈交戲，兩大好戲之人高手過招，令觀眾睇到拍爛手掌。

劇情講述淑嫻（盧宛茵飾）與帶弟（林秀怡飾）憑蛛絲馬跡尋至悅萍（陳煒飾）的住處，企圖帶走宏智（徐榮飾）。淑嫻一直懷疑悅萍「假懷孕」，於是趁對方帶宏智去洗手間的空檔，偷偷潛入房間搜查線索。

未料悅萍十分機警，即時識破並上房當面對質，理直氣壯地大聲質問：「你肯定覺得我個肚係假，想上嚟搵證據揭穿我，離間我同阿智，係咪呀？」淑嫻亦毫不退縮，淡定反擊：「喺度扮大肚，呢啲屎橋都出埋，肯定好多衰嘢唔畀得人知啦！我一定會篤爆你，我一定唔會畀你奸計得逞呀！」

面對奶奶的指控，悅萍突然瞪大雙眼，一臉挑釁且極度陰險地吐出一句：「你敢同我鬥？」淑嫻見狀隨即推開對方，悅萍竟順水推舟，借意撞向椅子跌倒在地，更摸着孕肚大喊「好痛」。她精心設計這一幕，目的就是令宏智對淑嫻生氣，從而成功離間兩母子感情。

這場婆媳大戰成為全集焦點，陳煒的凌厲眼神加上一副「乞人憎」的嘴臉，演繹得「奸到出汁」，加上對手是好戲之人盧宛茵，令觀眾極度投入。大批網民紛紛留言大讚：「煒哥嗰句『你敢同我鬥？』簡直係宮廷劇劇情」「煒哥真係做得好衰格，睇到都想打佢」「佢同Madam啲嘈交戲真係好正」「好似睇緊《宮心計》」。