女神配對計劃2｜吳旭東重溫與阮嘉敏首次約會 Sweet爆大晒粉絲應援情侶漫畫

戀愛綜藝節目《女神配對計劃2》持續熱播，其中阮嘉敏（Mandy）與吳旭東（東東）的甜蜜自然互動，一直深受大批觀眾與網民喜愛。日前，吳旭東特別在社交平台分享二人首次約會的難忘經歷，並大談一路走來的相處心聲。

吳旭東透露，二人初次單獨食飯可追溯至去年年底。他回憶寫道：「還記得去年12月14號喺西安，拍完戲之後嗰晚嘅晚飯。當時我哋天南地北咁傾計，有時佢講嘅嘢我聽得明，有時又聽唔太明，甚至要攞手機打出字先可以搞懂，有時一個唔複雜嘅話題，都可以傾足十幾分鐘。」

談及對阮嘉敏的印象，東東大讚對方是個陽光女孩：「佢係一個好鍾意笑、笑起上嚟好陽光嘅女仔。情緒一上嚟，把口就好似機關槍一樣，突突突突……哈哈哈哈。可能換轉係其他人或許會有啲不耐煩，但我反而覺得嗰晚食飯真係超有意思。」他亦坦言平時在不熟悉的異性面前較為拘謹、不太說話，但面對嘉敏時卻能暢所欲言，全因對方的狀態能讓他放鬆。他更感嘆當晚的飯局適逢自己12月6日生日後不久，算是一頓意外收穫的生日飯。

事隔數月，東東直言沒想到自己會為了嘉敏跨越遠距離來到另一座城市，甚至在節目中奮力爭取，只為了能安安靜靜坐下與她吃一頓甜品。他感性表示：「好多事真係出乎意料。唔論節目畫面睇落係點，至少呢一段經歷，對於我來講係真實嘅。亦都唔知今年嘅12月14號，我哋睇可唔可以再一齊坐低食頓飯。多謝呢段難得嘅時光，亦都多謝嘉敏✨另外要感謝粉絲寶寶畀我啲製作嘅漫畫 多謝嗮！」