死有對証｜王菲激吻黃俊豪！大讚對手有風度 親爆拍親熱戲有向另一半備案：佢好支持我

《死有對証》劇情愈來愈激！昨晚（28日）播出一集，美寧（王菲飾）竟然向「高富帥」Michael（黃俊豪飾）獻出螢幕初吻，令正印男友高俊（馬貫東飾）慘慘豬「戴綠帽」，三角關係極度緊張，隨時引爆網民熱話！

劇情講到美寧想與帥氣富有的 Michael 合資瑜伽中心，但高俊一眼睇穿對方有不良企圖。高俊踩上 Michael 公司暗中調查，Michael 竟用激將法狂寸高俊：「你知唔知你衰乜嘢？你衰無錢！」幸好高俊忍住冇中計，僅警告對方收手。豈料心機極重的 Michael 竟然自製傷勢，向美寧「屈」高俊打人兼威脅撤資，令美寧對男友徹底心死，提出分開冷靜。

美寧大受打擊，相約 Michael 飲酒大吐苦水，埋怨與高俊拍拖愈來愈攰：「依家連我識乜朋友都要管！」Michael 見機不可失，即刻趁虛而入向美寧深情表白，更主動霸王硬上弓咀嘴，成功奪取芳心。

原來這場激吻戲是王菲入行以來的「螢幕初吻」，她接受 tvb.com 獨家訪問時坦言初時相當緊張：「當收到劇本知道對手係 Jeremy（黃俊豪）都放心啲，因為我本身識佢冇咁緊張。同埋呢場戲喺後期先拍，我哋事前都有 Warm up，已經入咗戲。」她更大讚 Jeremy 極具風度，鏡頭後會主動溝通，令拍攝過程順利兼零尷尬。

至於拍親熱戲有冇向真實的另一半「備案」？王菲笑言有主動申報：「佢初時以為對手係阿東（馬貫東），仲講笑話嗰晚要睇少一集！但其實佢好支持我，因為佢都做過幕前，好清楚演員要專業完成每個角色，依家佢每一集都有捧場！」