洪永城帶細女搭叮叮睇風景 兩父女伸脷自拍神同步

洪永城（Tony）雖然平日工作忙碌，但只要一有空餘時間，便會爭取機會陪伴兩位女兒，盡情享受親子之樂。日前，Tony 帶同細女（阿妹）外出，當問到女兒最想去哪裡時，囡囡竟然回答想搭「叮叮」（電車），更以一句「I want to see everything」表達心願。

作為「廿四孝爸爸」的 Tony 當然立刻滿足囡囡的要求，帶她乘搭「叮叮」沿途欣賞港島區的風景。從照片中可見，阿妹十分乖巧地坐在電車的經典木椅上，眼仔睩睩，模樣極度精靈可愛。

在車程中，兩父女更狂玩自拍，大展各種搞笑「表情包」。二人齊齊對著鏡頭伸脷賣萌，表情猶如「餅印」一樣神同步；在另一張照片中，只見 Tony 在鏡頭前擘大口，而阿妹則在旁邊嘟起嘴仔，可愛指數爆燈！這組溫馨搞笑的互動隨即吸引大批粉絲留言，紛紛大讚：「妹妹太得意」、「紅卜卜好得意」。