呂慧儀帶「蟹籽」視察加拿大名校 獨家親回升學大計揭私心願望：想畀蟹籽感受多啲

處境劇《愛．回家之開心速遞》早前順利完成拍攝，「長腳蟹」呂慧儀馬上化身廿四孝媽媽，帶着愛子「蟹籽」飛赴加拿大探親兼放假。期間她更帶阿仔參觀當地頂尖學府卡加利大學，惹來大批網民紛紛猜測為兒子到外國升學鋪路。

一直對教育非常上心的呂慧儀，在社交網大方分享了兩母子參觀大學的溫馨片段。片中可見，12歲的「蟹籽」長高不少，兩人溫馨合照留念，度過了美好的親子時光。她感性發文寫道：「我相信教育亦是開啟未來的鎖匙，這次出行也想讓蟹籽在玩樂中有點學習的氛圍。📚 我們參觀了卡加利大學，讓蟹籽感受一下大學校園的氣息。」

她透露此行特別參觀了工程學院：「在漫長升學路上再汲取多些資訊，的確是一個不錯的旅程。✈️ 一份工作完結之後就是新工作的開始，我享受工作，也享受生活，今天晚上，還是要《愛回家》呢❤️。」

談到此行特意參觀卡加利大學，呂慧儀接受tvb.com獨家訪問說：「因為卡加利大學有好多學院，我想睇吓佢哋嘅工程學院同我以前讀嘅有咩唔同，感受外國大學嘅氣氛見識吓。」 她續說：「暑假漫長，難得有機會出外都想畀蟹籽見多啲感受多啲。除咗為我嘅教育中心做資料蒐集，亦希望將來有需要嘅時候可以畀多啲有用嘅意見畀蟹籽，始終小朋友成長必經升學嘅階段，我自己識多啲都係有幫助。」

問到她是否有意安排兒子到外地升學，呂慧儀說：「暫時都會留喺香港讀書，睇吓將來佢會唔會想出國留學，雖然我自己就好想佢可以喺返香港讀科技大學，咁我就可以做佢校友。但係未來嘅嘢都未知，所以我要做定準備功課，自己知多啲先。」

她又指「蟹籽」十分喜歡科技大學，「之前佢同我一齊返科技大學嘅校友活動，佢話佢好鍾意我間學校，好大好靚。但距離佢讀大學都仲有啲時間，都要睇吓到時佢想讀咩學科。」