夫妻的博弈｜黃文慧霸氣登場演當家之主 40年再亮相TVB全因一個情意結

TVB《夫妻的博弈》劇情高潮迭起，5日播出一集更迎來重量級嘉賓！曾演活無數經典霸氣角色的黃文慧（Bonnie姐），相隔40年再度亮相TVB劇集，化身豪門當家之主。她甫出場即氣場全開，超強的壓迫感令大批觀眾大呼驚喜！

劇情講述家謙（馬國明 飾）主理的珠寶廣告意念遭對家公司捷足先登，更被插贓嫁禍指控出賣公司。危機之際，家謙的真正身份終於曝光——原來他正是衍嶸集團的二公子！

衍嶸集團當家之主葉卓苓君（黃文慧 飾）貴氣登場，質問家謙有何解決方法。孫女葉熙妍（游嘉欣 飾）心急護航，提議公開身份以保平安。葉卓苓君聞言不為所動，隨即展現出令人窒息的霸氣，眼神銳利地反斥熙妍：「家族傳統喺公司做嘅就要隱瞞身份，由低做起，你講咩呀？又係你話要入廣告公司幫二哥手，幫到啲咩出嚟呀？」嚇得熙妍立即噤聲。最終大哥葉啟榮（黃智賢 飾）提出令葉卓苓君滿意的解決方案，盡顯其在公司和家庭上崇高且不可撼動的地位。

黃文慧雖然只出現短短一幕，但已引起網民熱烈討論。不少觀眾大讚她不論眼神還是語氣均盡顯霸氣，絕對是演這個角色的最佳人選，紛紛留言：「Bonnie姐好正呀！」、「細細個就睇佢，佢做呢個嫲嫲冇得輸啦！」、「好想聽佢講：你呢啲叫誅，唔係鬆」。

相隔40年再度亮相TVB劇集，黃文慧接受訪問時坦言心情複雜且十分驚喜：「我好開心可以拍到呢個角色，因為我都離開咗TVB幾十年，我亦都已經幾十歲，仲有機會畀TVB嘅人認識我，真係好開心。」

談到接拍因由，她透露全因一份深厚的情意結：「今次係監製黃國輝邀請我，我同佢爸爸黃達龍識咗好多年，我哋嗰時叫佢達哥同大師兄，佢係一個好出名嘅攝影師。之後有日佢個仔打嚟搵我，同我講達哥係佢爸爸，就係因為呢個情意結，我重於情義就答應佢做呢個角色。」她亦表示今次劇本十分吸引，作為當家之主測試一班孫兒能否繼承家業，是一個相當好玩的角色。

現年75歲的黃文慧入行逾半世紀，在影視界拍過無數膾炙人口的作品，演繹潑辣奶奶及反派角色更是深入民心。她於60年代加入TVB，曾參演《家變》、《天虹》、《京華春夢》、《射鵰英雄傳》等經典劇集，而最後一部作品已是《英雄故事》。